Cəfərov Təyyar Abbas oğlu, 1932-ci ildə Kəlbəcər rayonunun Yanşaq kəndində ruhani ailəsində anadan olmuşdur. O, 1941-ci ildə kənd orta məktəbinə daxil olmuş, 1951-ci ildə oranı müvəffəqiyyətlə bitirmişdir.
T.A.Cəfərov orta məktəbi bitirəndən sonra o, 1951-ci ilin sentyabr ayında Zallar kəndində təşkil edilmiş azsavadlılar kursuna müəllim təyin edilmiş və 1952-ci ilin mart ayına kimi həmin vəzifədə işləmişdir. 1952-ci ilin mart ayından 1954-cü ilin sentyabr ayına qədər hərbi xidmətdə olmuşdur və savadlı olduğuna görə hərbi hissədə yazar vəzifəsində çalışmışdır. Hərbi xidmətdən qayıtdıqdan sonra 1955-ci ildə AKTİ-nun zootexnik fakültəsinə daxil olub, 1960-cı ildə oranı müvəffəqiyyətlə başa vurmuşdur. 1960-61-ci illərdə Şəmkir rayonunun Qapanlı kəndində böyük zootexnik vəzifəsində işləmişdir. 1961-ci ilin sentyabrından 1964-cü ilin dekabrına qədər AZKTİ-nin maldarlıq və atçılıq kafedrasında asistent vəzifəsində işləmiş və həmin müddətdə nümunəvi işinə görə 3 il ərzində hər il rektorluğun təşəkkürünə layiq görülmüşdür.
T.A.Cəfərov 1965-ci ilin yanvar ayında AZKTİ-nun imtahan verərək, aspiranturaya daxil olmuşdur. 1967-ci ilin dekabrında aspiranturanı müvəffəqiyyətlə qurtarmışdır. O, 1968-ci il namizədlik dissertasiyası müdafiə edərək, kənd təsərrüfatı üzrə elmlər namizədi alimlik dərəcəsi almışdır.
T.A.Cəfərov 3 illik aspirant hazırlığı dövründə çoxlu müxtəlif elmi ədəbiyyatı oxuyub təhlil etmiş, dəqiq hazırladığı metodika əsasında müxtəlif variantlarda 10 minə qədər laboratoriya təhlilləri aparmış və nəticədə camış südündə zülal faizini təyin etmiş, ekspres metodunu işləyib hazırlamışdır. Həmin metodla bir iş günündə bir nəfər 100 başdan çox camışın südünün zülal faizini təyin edə bilər. Bu işin sürətinin, əmək məhsuldarlığının 10 dəfədən çoz artmasına səbəb olur. Həmin metodun köməyi ilə camış südünün orta illik zülal, yağ və ümumi quru qalıq faizinin hesablamağın əmsallarını işləyib hazırlamışdır. Bu əmsalların köməyi ilə 10 aya görülən işi 1 günə görmək mümkündür.
T.A.Cəfərov aspirant olduğu müddətdə 4 dəfə Zaqafqaziya institutlararası Elmi Konfranslarda elmi məruzələr ilə çıxış etmişdir.
T.A.Cəfərovun 10 səhifəlik bir elmi məqaləsi xalqlararası materialları ilə birlikdə “Genetika və südlük mal cinslərinin seleksiyası” kitabında nəşr edilmişdir. Həmin kitab ingilis, alman, fransız və s. dillərdə də nəşr edilərək, dünyanın bir çox olkələrinə yayılmışdır. Bir neçə elmi məqalələri də mərkəzi jurnallarda nəşr edilərək bir çox xarici ölkələrə göndərilmişdir.
T.A.Cəfərov aspiranturanı qurtardıqdan sonra, 1967-70-ci illərdə AZKTİ-də baş metodist, 1971-ci ildə Azərbaycan Elmi Tətqiqat Heyvandarlıq İnstitutunda elmi katib, 1972-ci ildən bəri isə Gəncə Kənd Təsərrüfatı Texnikumunda müəllim vəzifəsində çalışmışdır. O, 30-a qədər elmi əsərin ,4 dərsliyin və dərs vəsaitinin müəllifidir. Hal-hazırda Gəncə Kənd Təsərrüfatı Texnikumunda və Ekologiya İnstitutunda müəllim işləyir.
Comentários